Traité de Brétigny


8 mai 1360

Château de Brétigny

Charles, ainsne filz du Roy de France, regent le Royaume, duc de Normandie, & Dauphin de Vienne, a touz ceulz, qui ces presentes lettres verront, salut.
Nous vous faisons sçavoir que de touz les debaz & descorz quelconques, meuez & demenez, entre monsire le Roy de France & nous d'une part, & le Roy d'Engleterre d'autre part;
Pour bien de pais, est accorde le viii. jour de May, l'an de Grace mill CCC soixante, a Bretigny de les Chartres, en la maniere qui s'ensuit;
l. Premierement, que le Roy d'Engleterre, aveuc ce que il tient en Guyenne & en Gascoigne, aura, pour lui & pour ses hoirs, perpetuelment & a touz jours, toutes les choses qui s'ensuivent, a tenir par la maniere, que le Roy de France & son filz, ou aucun de ses ancestres, Roys de France les tindrent, c'est asçavoir;
Ce que en souvereinete en souvereinete, ce que en demaine en demine, & par les temps & manieres au dessouz declares; La cite, & le chastel, & la conte de Poitiers, & toute la terre & le paiis de Poitou, ensamble les fiez de Thoart, & la terre de Beleville;
La cite & le chastel de Xainctes, & toute la terre & le pais de Xainctonge, par deça & par dela la Charente;
La cite & le chastel d'Agen, & la terre & le paiis d'Agenois;
La cite, & le chastel, & toute la conte de Pierregort, & la terre & le paiis de Pierreguys;
La cite & le chastel de Limoges, & la terre & le paiis de Limosin;
La cite & le chastel de Caours, & la terre & le paiis de Caourcin;
La cite, & le chastel, & le paiis de Tarbe, & la terre, paiis, & conte de Bigorre;
La conte, la terre, & le paiis de Gaure;
La cite & le chastel d'Engolesme, la conte, la terre, & le paiis d'Engolesmois;
La cite & le chastel de Rodeis, &
La terre & paiis de Rovergne;

Et s'il y a aucuns seigneurs, comme le conte de Foix, le conte d'Armignac, le conte de Lille, le conte de Pierregort, le viconte de Limoges, ou autres, qui teignent aucunes terres ou lieux, dedenz les metes des ditz lieux, il feront hommage au Roy d'Angleterre, & touz autres services & devoirs, deuz a cause de leur terres ou lieux, en la maniere que il ont fait ou temps passe.
II. Item, aura le Roy d'Angleterre tout ce, que le Roy d'Engleterre, ou aucun des Roys d'Engleterre aunciennement tindrent en la ville de Monstereel sur la Mer, & les appartenances.
III. Item, aura le dit Roy d'Englettere toute la conte de Pontieu tout entierement; sauf & excepte que, se aucunes choses ent esté alienées, par les Roys d'Engleterre, qui ont esté pour le temps, de la ditte conte & appartenances, & a autres personnes, que aus Roys de France, le Roy de France ne sera pas tenu de les rendre au Roy d'Engleterre.
Et, se les dittes alienations ont esté faites aus Roys de France, qui ont esté pour le temps, senz aucun moien, & le Roy de France les tiegne ad present en sa main, il les lessera au Roy d'Engleterre entierement; excepté que, se les Roys de France les ont euz par eschange pour autres terres, le Roy d'Engleterre delivera au Roy de France ce que l'on a eu par eschange, ou li lessera les choses ainsi alienées.
Mais, se le Roys d'Engleterre, qui ont esté pour le temps, en avoient aliene, ou transporte, aucunes choses en autres personnes, que es Roys de France, & depuiz soient venues es mains du Roy de France, ou aussi par partage, le Roy de France ne sera paz tenu de les rendre.
Aussi, se les choses dessus dittes doivent homage, le Roy les baillera à autre, qui en fera hommage au Roy d'Engleterre; &, se il ne doivent hommage, le Roy de France baillera un tenant, qui li en fera le devoir dedenz un an, prochein apres ce que il sera partie de Calais.
IV. Item, le Roy d'Engleterre aura le chastel & la ville de Calais;
Le chastel, la ville, & seignourie de Merch;
Les villes, chasteaux, & seignouries de Sangate, Couloigne, Hames, Wale, & Oye, aveuc terres, bois, marios, rivieres, rentes, seignouriez, advoiaisons d'esglises, & toutes autres appartenances, & lieux, entregisanz dedenz les metes ou bonnes qui ensuivent; c'est asçavoir,
De Calais jusques au fil de la riviere par devant Gravelinghes; & aussi, par le fil de mesme la riviere, tout entour Langle; & aussi, par la riviere qui va par dela Poil; & ausi, par mesme la riviere, qui chiet ou grant lac de Guignes, & jusques a Fretun; & d'illeuc par la vallee entour la montaigne de Calbully, encloant mesme la montaingne, & aussi jusques a la mer, avec Sangate, & toutes ses appartenances.
V. Item, le dit Roy d'Angleterre, aura le chastel, & la ville, & tout entierement la conte de Guignes, aveuc toutes les terres, villes, chasteaux, forteresces, lieux, hommes, hommages, seignouries, bois, forez, droitures d'icelles, aussi entierement comme le conte de Guignes, derrenement mort, les tint ou temps de sa mort: & obeiront les eglises & les bonnes genz, estanz dedenz les limitations du dit conte de Guignes, de Calays, & de Merch, & des autres lieux dessus diz, au Roy d'Engleterre, aussi comme il obeissoient au Roy de France, & au conte de Guignes qui fu pour le temps;
Toutes les quelles choses, de Merch & de Calais, contenues en cest present article & en l'article prochein procedant, le Roy d'Engleterre tendra en demaine: excepté les heritages des eglises, qui demourrent aus dittes eglises entierement, quelque part q'il soient assiz; & aussi exceptés les heritages des autres genz des paiis de Merch & de Calais, assiz hors de la ville de Calays, jusques a la value de cent livres de terre par an, de la monnoye courant au paiis & au dessouz: les quels heritage leur demourront jusques a la value dessus dite et au dessouz;
Mais les heritages & heritations, assisez en la ditte ville de Calais, aveuc leur appartenances, demourront, en demaine, au Roy d'Engleterre, pour en ordener a sa voulante; & aussi demourront aus heritanz, en la conte, ville, & terre de Guignes, touz leurs demeines entierement, & revendront plainement; sauf ce que dit est des confrontations, metes, & bonnes en l'article prechein procedant.
VI. Item, accorde est que le dit Roy d'Engleterre, & ses hoirs, auront & tendront toutes les illes, adjacens aus terres, paiis, & lieux avant nommez, ensamble aveuques toutes les autres illes, les quelles le dit Roy d'Engleterre tient a present.
VII. Item, est accorde que la dit Roi de France, & son ainsne filz, le regent, pour euls, & pour touz leurs hoirs & successeurs, au plutost que bien pourra, senz fraude & senz mal engin, & au plustart dedenz la feste Saint Michiel, prochein venir, en un an, rendront, bailleront, & delivreront an dit Roy d'Engleterre, & a touz ses hoirs & successeurs, & transporteront en euls, toutes les honneurs, obediences, hommages, ligeances, vassauls, fiez, services, recognoissances, droitures, mere & mixte impere, & toutes manieres de jurisdictions hautes & basses, ressorz, & sauvegards, avoaisons & patronages d'eglises, & toutes manieres de seignouries & souvereinetez, & tout le droit q'il avoient ou povoient avoir, appartenoient, appartienient, & povent apartenir, pour quelque cause, tiltre, ou couler de droit, a euls, aus Roys & a la couronne de France, pour cause des citez, contes, chastiaux, villes, terres, paiis, illes, & lieux avant nommez, & de toutez leur appartenances & appendences, quelque part qu'il soient, & chascune d'icelles, senzy riens retenir a euls, a leurs hoirs ne successeurs, aus Roys ne a la couronne de France:
Et aussi manderont le diz Roy & son ainsne filz, par leurs lettres patentes, a touz arcevesques, evesques, & autres prelaz de sainte eglise, & aussi aus contes, viscontes, barons, nobles, citoienz, & autres quelconques des citez, contes, terres, paiis, illes, & lieux avant nommez, qu'il obeissent au Roy d'Engleterre, & a ses hoirs, & a leur certain commandement, en la maniere qu'il ont obei aus Rois & a la couronne de France:
Et, par mesme les lettres, leur quittront & absoldront, au mielx qu'il se pourra faire, de touz hommages, fois, seremenz, obligations, subjections, & promesses, faiz, par aucun d'euls, au Roy & a la couronne de France en quelque maniere.
VIII. Item, accorde est que le Roy d'Engleterre aura les citez, contez, chasteaux, terres, paiis, ylles, & lieux avant nommez, aveuc toutes les appartenances & appendences, quelque part qu'il soient, a tenir a luy, & touz ses hoirs & successeurs, heritablement & perpetuelement, en demaine ce que le Roy de Fraunce y avoit en demaine & aussi en fie, service, souvereinete ou resort, ce que les Roys de France y avoient; sauf tout que dit est par dessus en l'article de Calais & de Merch.
Et, se des cites, contes, chasteaux, terres, paiis, illes, & lieux avant nommez, souvereinetes, drois, mere & mixte impere, jurisdictions, & profiz quelconqes, que tenoit aucuns Roys d'Engleterre illovecques, & en leur appartenances & appendences quelconques, aucunes alienations, donations, obligations, ou charges ont este faitez par aucuns des Roys de France, qui ont este pour le temps puiz lxx. anz en ca, par quelque fourme ou cause que ce soit, toutes teles donations, alienations, obligations, & charges sont dessores, & seront du tout, rappelees, cassees, & annullees, & toutes choses, ainsi donnees, alienees, ou chargees, seront realment & de fait rendues & baillees au dit Roy d'Engleterre, ou a ses deputes especiauls, a mesme l'entierete, comme il furent aus Roys d'Engleterre depuis lxx. anz en ca, au plustot que l'en pourra, sanz mal engin, & au plustart dedenz la Saint Michel, prochein venant, en un an, a tenir au dit Roy d'Engleterre, & a touz sez hoirs & successeurs, parpetuelment & heritablement, par maniere que dessus est dit; excepte ce qui est dit par dessouz en l'article de Pontieu, qui demourra en sa force; & sauf & excepte toutes les choses donnees & aliennes aus eglises, qui leur demourront paisiblement en tous les paiz & lieux, ci dessus & dessouz nommez; si que les persones des dittes eglises prient diligement pour les diz Roys, comme pour lours fondeurs; sur quoy leur consciences en seront chargees.
IX. Item, est accorde que le Roy d'Engleterre toutez les citez, villes, chasteaux, & paiis dessouz nommez, qui anciennement n'ont este des Roys d'Engleterre, aura & tendra, en l'estat & aussi, comme le Roy de France, ou ses filz, les tiennent a present.
X. Item, est accorde que, se, dedenz les metes des ditz paiis, qui furent anciement des Roys d'Engleterre, auroient aucunes choses, que autrefoitz n'eussent este des Roys d'Engleterre, dont le Roy de France estoit en possession le jour de la bataille de Poytiers, qui fu le xix. jour de Septembre, l'an mill CCCLVI. elles en serront & demourront au Roy d'Engleterre, & a ses hoirs, en la maniere que dessus est dit.
XI. Item, est accorde que le Roy de France, & son ainsne filz, le regent, pour euls, & pour leurs hoirs, & pour touz les Roys de France, & leurs successeurs, a touz jours, au plutost que pourra faire, sanz mal engin, & au plustart dedenz la Saint Michiel, prochein venant, en un an, rendront & bailleront au dit Roy d'Engleterre, & a touz ses hoirs, & successeurs, & transporterant en euls touz les honneurs, regalites, obediences, hommages, ligeances, vassauls, fiez, services, recognoissances, serements, droitures, mere & mixte impere, toutes manieres de jurisdictions hautes & basses, ressors, sauvegardas, & seignouries & souvereinetes, qui appartenoient, appartienent, ou purroient en aucune maniere appartenir, aus Roys & a la couronne de France, ou a aucune autre personne, a cause du Roy & de la couronne de France, en quelque temps, es citez, contes, chasteaulx, terres, paiis, illes, & lieux avant nommez, ou en aucun d'euls, & a leur appartenances & appendences quelconques, ou es personnes, vassauls, ou subgiez quelconques d'iceuls, soient princes, dux, contes, vicontes, arcevesques, evesques, & autres prelaz d'eglises, barons, nobles, & autres quelconques, sanz riens a eulz, leurs hoirs, & successeurs, la couronne de France, ou autre que ce soit, retenir ne reserver en yceuls, pour quoy liz, ne leurs hoirs, & successeurs, ou autres Rois de France, ou autre que ce soit, a cause du Roy ou de la couronne de France, aucune chose ne pourront chalengier ou demander, ou temps avenir, sur le Roy d'Engleterree, ses hoirs, & successeurs, ou sur aucun de vassauls & subgiez avantdiz, pour cause des paiis & lieux avant nommez.
Einsi que tous les avant nommez personnes, & leurs hoirs, & successeurs, perpetuelment seront hommes liges & subgiez du Roy d'Engleterre, & a touz ses hoirs, & successeurs.
Et que le dit Roy d'Engleterre, ses hoirs, & successeurs, toutes les personnes, citez, contez, terres, paiis, illes, chasteaulx, & lieux avant nommez, & toutes les appartenances & appendances, tendront, auront, & a eulz demourront pleinement, perpetuelment, & franchement, en leur seignourie, souvereinete, & obeissance, ligeance & subjection, comme les Roys de France les avoient & tenoient en aucun temps passe;
Et que le dit Roy d'Engleterre, ses hoirs, & successeurs, auront & tendront perpetuelment touz les pays avant nommez, aveuc leur appartenances & appendences, & les autres choses avant nommes, en toute franchise & liberte parpetuele, comme seigneur souverain & lige, & comme voisins au Roy & au royaume de France, senz y recognoistre souvereinte, ou faire aucune obedience, hommage, ressort, subjection, & senz faire, en aucune temps avenir, aucuns service ou recognoissance, aus Rois ne a la couronne de France, des citez, contez, chasteaux, terres, paiis, illes, lieux, & personnes avant nommez, ou pour aucun d'icelles.
XII. Item, est accorde, que le Roy de France, & son ainsne filz, renounceront expressement aus diz ressorz & souvereinetes, & a tout le droit qu'ils ont, ou povent avoir, en toutes les choses qui, par ce present traittie, doivent appartenir au Roy d'Engleterre.
Et, samblablement, le Roy d'Engleterre, & son ainsne filz, renounceront expressement a toutes les choses qui, par ce present traittie, ne doivent estre baillees, ne demourer au Roy d'Engleterre, & a toutes les demandes qu'il fasoit au Roy de France;
Et, par especial, au nom & au droit de la couronne & du royaume de France;
Et a l'omage, souverainete, & demeine du duchie de Normandie, de Toureine, des contez d'Anjou & du Maine;
Et a la souvereinete & hommage du duchie de Bretaigne;
A la souvereinete & hommage du conte & paiis de Flandres;
Et a touz autres demandes, que le Roy d'Engleterre fasoit, ou faire pourroit, au Roy de France, pour quelconque cause que ce soit, oultre ce, & excepte que, par ce presente traittie, doit demourer & estre baille au dit Roy d'Engleterre, & a ses hoirs.
Et transporteront, cesseront, & delaisseront l'uns Roys a l'autre, parpetuelment, tout le droit que chascun d'euls peut avoir en toutes les choses qui, par ce present traitte, dovient demourer ou estre baillies a chascun d'eulz; & du temps & lieu, ou & quant les dittes renunciations se feront, parleront & ordeneront les deux Roys a Calas ensamble.
XIII. Item est accorde, a fin que ce presente traittie puisse estre plus briefment accompli, que le Roy d'Engleterre fera amener le Roy de France a Calais, dedens iii. sepmaines apres la Nativite Saint Jehan Baptiste, prochein venant, cassant tout juste empeschement, aus despenz du Roy d'Engleterre; hors les frais de l'ostel du dit Roy de France.
XIV. Item, est accorde que due le Roy de France paiera au Roy d'Engleterre iii. milions d'escuz d'or; dont, les ii. valent un noble, de la monnoie d'Engleterre:
Et en serront paiez au dit Roy d'Engleterre, ou a ses deputez, vic mille escuz a Calais, dedenz quatre mois, a compter depuiz que le Roy de France sera venu a Calais:
Et, dedenz l'an deslors prochein ensieuvant, en seront paiez ivc mille escuz, tels comme dessuz, en la cite de Londres en Engleterre:
Et deslorz, chascun an prochein ensuivant, ivc mille escuz, tels comme devant, en la ditte cite, jusques a tant que les diz iii. millions seront parpaiez.
XV. Item, est accorde que,
Pour paiant les diz vic mille escuz a Calais, & pour baillant les ostages, a dessouz nommez, & delivrant au Roy d'Engleterre, dedenz les iv. moys, a compter depuiz que le Roy de France sera venu a Calais, comme dit est, la ville & les forteresces de la Rochele, & les chasteaux, forteresces, & villes de la conte de Guynes, aveuc toutes les appartenances & appendances:
La personne du dit Roy sera toute delivre de prison, & pourra partir franchement de Calais, & venir en son pouvoir, senz aucun empeschement, mais il ne se pourra armer, ne sez genz, contre le Roy d'Engleterre, jusques a tant qu'il ait acompli ce qu'il est tenu de faire par se present traittie; & sont ostages, tant prisons pris a la bataille de Poitiers, comme autres, qui demourront pour le Roy de France, ceuls qui s'ensuit; c'est assavoir,

Monsire Loys, conte d'Anjou,
Monsire Jehan, conte de Poitiers,
Le duc d'Orliens,
Le duc de Bourboun,
Le conte de Bloys, ou son frere,
Le conte d'Alencon, ou monsire Pierre d'Alencon, son frere,
Le conte de Saint Pol,
Le conte de Harecourt,
Le conte de Portien,
Le conte de Valentinoys,
Le conte de Breme,
Le conte de Vaudemonz,
Le conte de Forez,
Le viconte de Beaumont,
Le sire de Couci,
Le sire de Fienles,
Le sire de Preaus,
Le sire de Saint Venant,
Le sire de Garentieres,
Le dauphin d'Auvergne,
Le sire de Hangest,
Le sire de Montmorency,
Monsire Guillem de Craon,
Monsire Loys de Harecourt,
Monsire Jehan de Ligny;

Ces sont les noms des prisons, qui furent pris en la bataille de Poitiers,

Monsire Phelippe de France,
Le conte de Eu,
Le conte de Longueville,
Le conte de Pontieu,
Le conte de Tancarville,
Le conte de Joigny,
Le conte de Sanceurre,
Le conte de Donmartin,
Le conte de Ventadour,
Le conte de Salebruche,
Le conte de Anceurris,
Le conte de Vendosme,
Le sire de Craon,
Le sire de Derval,
Le mareschal de Deneham,
Le sire d'Aubigny.

XVI. Item, est accorde que les diz seze prisons, qui veront demourrer en hostage, pour le Roy de France, comme dit est, seront parmi ci delivres de leurs prisons, senz paier aucune raencon pour le temps passe, se il n'ont este a acort de certaine raencon par convenences, faites par avant le tiers jour de May darrien passe; & se aucunes d'euls est hors d'Engleterre, & ne se rent a Calais, en ostage, dedenz le primier moys apres les dittes iii. sepmaines de la Saint Jehan, cessant juste empeschement, il ne sera paz quitte de la prison, mais sera contrains, par le Roy de France, a retourner en Engleterre, comme prisonnier, ou a paier la peine, par luy promise, & encourue, par deffaut de son retour.
XVII. Item, est accorde que, en lieu des diz ostages, qui ne vendrunt a Calays, ou qui demourront, ou se departiront senz congie hors du povoir du Roy d'Engleterre, le Roy de France sera tenu de en bailler d'autres, de semblable estat, au pluspres qu'il pourru estre fait, dedenz iv. moys, prochein apres que le baillif d'Amiens, ou le maire de Saint Omer, en sera sur ce par lettres du dit Roy d'Angleterre certeifie; & pourra le Roy de France, a son departir de Calais, amener, en sa compaignie, x. des ostages, tels comme les deux Roys accorderont; & suffira que, du nombre de xl. dessus diz, en demeure jusques au nombre de xxx.
XVIII. Item, est accorde que le Roy de France, dedens iii. moys apres ce qu'il sera parti de Calais, rendra a Calais, en ostage, iv. personnes de Paris, & ii. personnes de chascune des villes, dont les noms s'ensuist; c'est assavoir,

De Saint Omer,
Charters,
Arras,
Thoulous,
Amiens,
Lion,
Beauvez,
Orliens,
Lisle,
Compiegne,
Douay,
Rouen,
Tournary,
Caen,
Reims,
Tours,
Chaalons,
Bourges,
Troyes,

plus souffisanz des dittes villes, pour la complissement de ce present traittie.
XIX. Item, est accorde que le Roy de France sera amene d'Angleterre a Calais, & demorra a Calais par iv. mois apres sa venue; mais il ne paiera riens, du premier moys, pour cause de sa garde, &, pour chascun des autres moys ensuit, qu'il demourra a Calais, par deffaut de lui ou de ses gens, il paiera, pour ses gardes, x. mil' roiauls, tels comme il courent ad present en France, avant son partir de Calais; & ainsi au fuer du temps, qu'il y demourra.
XX. Item, est accorde qu', au plustost que faire se pourra, dedenz l'an prochein apres ce que le Roy de France sera parti de Calais, monsire Jehan conte de Montfort, aveuc toutes ses appertenances, en faisant hommage lige au Roy de France, & devoir, & service en tous caz, tels comme bon & loial vassal lige doit faire a son seigneur lige, a cause de la ditte conte; & aussi si seront renduz ses autres heritages, qui ne sont mie de la duchie de Bretaigne, en faisant hommage ou autre devoir qui appertendra.
Et, s'il veut aucune chose demander, en aucune des heritages, qui sont de la ditte duchie, hors du paiis de Bretaigne, bonne & brief raison li sera faite par la court de France.
XXI. Item, que sur la question, du demaine de la duchie de Bretaigne, qu' est entre le dit monsire Jehan de Montfort d'une part, & monsire Charles de Bloys d'autre part, accorde est que les ii. Roys, appeles pardevant euls, ou par leur deputez especiaulz, s'enfourmeront du droit des parties; & s'enforceront de mettre les parties a accort, sur tout ce qu' est en debat entre euls, au plustost qu'il pourront.
Et, en cas que les ditz Roys, par eulx, ne par leurs deputees, ne les pourrount accorder, dedans un an, prochein apres que le Roy de France serra arrivee a Calais, les amis, d'une partie & d'autre, s'enformeront diligeanment des droits des parties, par manere qui dessus est dit, & s'afforceront de mettre les dites parties a accord, au mieltz que faire se purra, a plus tost qu'ils pourront;
Et, se ilz ne les povent mettre a accort, dedenz demi an, adonc prochein ensuivant, ilz rapporteront aus diz ii. Roys, ou a leurs deputez, tout ce qu'il auront trouves sur le droit des dittes parties, & sur quoy le debat demourra entre les dites parties; & adonc les ii. Roys, par euls, ou par leurs deputez especiaulz, au plustost qu'il pourront, mettront les dittes parties a accort, ou diront leur final avis sur le droit de l'une partie & l'autre, & ce sera execute par les ii. Roys.
Et, en cas qu'il ne le pourroient faire, dedenz demi an prochein ensuit, adonques les ii. parties principauls, de Bloys & de Montfort, feront ce que mieulx leur samblera; & les amis d'une partie & d'autre aideront quelque part qu'il leur plaira, sanz empeschement des diz Roys, & senz avoir en aucun temps dommage, blasme, ne reproche, par aucun des diz Roys, pour la cause dessus ditte.
Et, se ainsi estoit que l'une des dittes parties ne vausist comparoir souffisaument devant les diz Roys, ou leurs diz deputez, ou temps qu'il y sera establi;
Et aussi en cas que les diz Roys, ou leurs deputez, auroient ordene, ou declarie, que les dittes parties fussent a accort, ou q'il auroient dit leur aviz pour le droit d'une partie, & aucune des dittes parties ne se voldroit accorder ad ce, ne obeir a la ditte declaration, adonqes les ii. diz Roys seront encontre lui de tout leur povoir, & en aide de l'autre qui se voldroit acorder & obeir; mais, en nul caz les ii. Roys, par leur propres personnes, ne par autres, ne pourront faire ne entreprendre guerre, l'une a l'autre, pour la cause devant ditte;
Et touz jours demourra la souvereinte & l'omage de la ditte duchie au Roy de France.
XXII. Item, que toutes les terres, paiis, villes, chasteaux, & autres lieux, baillees aus diz Roys, seront en telles libertes & franchises, comme elles sont ad present, & seront confermees par les diz seigneurs Roys, ou par leur successeurs, & par chascun d'euls, toute fois qu'il en seront sur ce requis, se contraires n'estoient a cest present accort.
XXIII. Item, que le diz Roy de France rendra, & fera rendre & establir de fait, a monsire Phelip de Navarre, & a touz ses adherens en appert, au plustost que l'en pourra, senz mal engin, &, au plustart, dedenz un an, prochein apres que le Roy de France sera parti de Calais, toutes les villes, chasteaux, forteresces, seignouries, droiz, rentes, profiz, jurisdictions, & lieux quelconques, que le dit monsire Phelip, tant pour cause de lui, come pour cause de sa femme, ou ses diz adherens, tindrent, ou devoient tenir ou royaume de Fraunce, & ne leur fera jamais le dit Roy reproche, domage, ne empeschement, pour aucunes choses, faites avant ces heures; & leur pardonera toutes offenses & mesprises, du temps passe, pour cause de la guerre; & sur ce auront ses lettres, bonnes & souffisanz; si que le dit monsire Phelip & ses avant diz adherens retournent en son hommage, & li soient bons & loiauls vassauls, & li facent ses devoirs.
XXIV. Item, est accorde que le Roy d'Angleterre pourra donner, c'este fois tant seulement, a qui qui lui plaira, en heritage toutes les terres & heritages, qui furent de feu monsire Godefroy de Harecourt, a tenir du duc de Normandie, ou d'autre seigneur, de qu'elles doivent estre tenues par raison, parmy les hommages & services, anciennement accoustumez.
XXV. Item, est accorde que nul homme, ne paiis, qu' ait este en l'obeissance d'une partie, & vendra par c'est accort a l'obeissance de l'autre partie, ne soit empeschie pour chose faite ou temps passe.
XXVI. Item, est accorde que les terres des banniz & adherenz, de l'une partie & de l'autre, & aussi des eglises, d'une roialme & de l'autre, & que touz ceulz qui sont desheritez ou ostes de leurs terres ou heritages, ou charges d'aucune pension, taille, ou redevance, ou autrement grevez, en quelque maniere que ce soit, pour cause de ceste guerre, soient restituez entierement en meisme le droit & possession, qu'il eurent devant la guerre commencie:
Et que toutes manieres de fourfaiteures, trespaz, & mesprisons, faiz par euls, ou aucun d'euls, en moien temps, soient du tout pardonnez:
Et que les choses soient faites au plustost que l'en pourra bonnement, & au plustart, dedenz un an, prochein apres ce qe le Roy sera partiz de Calais;
Excepte ce qu'est dit en l'article de Calais, de Merch, & des autres lieux nommez ou dit article:
Excepte aussi le viscónte de Fronssac & monsire Jehan de Galard; le quels ne seront paz comprinz en c'est article, mais demourront leurs biens & heritages en l'estat, qu'il estoient par avant cest present traittie.
XXVII. Item, est accorde que le Roy de France delivrera au Roi d'Angleterre, au plustost qu'il pourra bonnement, & donra, &, au plustart, dedenz la feste Saint Michiel, prochain venant, en un an, apres son partir de Calais, toutes les citez, villes, paiis, & autres lieux dessus nommez, qui par ce present traittie doivent estre bailles au Roi d'Angleterre.
XXVIII. Item, est accorde que, en baillant au Roy d'Angleterre, ou a autre pour luy par especial depute, les villes & forteresces, & toute la conte de Pontieu;
Les villes & forteresces, & toute la conte de Monfort;
La cite & le chastel de Xainctes;
Le chasteaux, villes, & forteresces, & tout ce, que le Roy tient en demaine, ou paiis de Xainctonge, deça & dela Charentre;
Et la cite d'Engolesme, & les chasteaulx, forteresces, & villes, que le Roy de France tient en demaine, en paiis d'Engolesmois, aveuc lettres & mandemenz, des delaissemenz des fiez, & hommages;
Le Roy d'Angleterre, a ses propres couz & fraiz, delivrera toutes les forteresces, prisez & occupeez par lui, par ses subgiez, adherenz, & aliez, es paiis de France, & de Toureine, d'Anjou, de Maine, de Berri, d'Auvergne, de Bourgoigne, & de Champaignie, de Picardie, & de Normandie, &de toutes les autres parties, terres, & lieux du royaume de France; excepte celles du duchie de Bretaigne, & des paiis & terres qui, par ce present traittie, doivent appartenir & demourer au Roy d'Angleterre.
XXIX. Item, est acorde que le Roy de France fera bailler & deliver au dit Roy d'Angleterre, ou a ses hoirs, ou deputez, toutes les villes, chasteaulz, forteresces, & autres terres, paiis, & lieux avant nommez, aveuc leurs appartenences, aus propres fraiz & ceux du dit Roy de France.
Et aussi que, se il y avoit aucuns rebelles, ou desobeissantes, de rendre, bailler, ou restituer au dit Roy d'Angleterre aucunes citees, villez, chasteaux, pais, lieux, ou forteresces, qui par ce present traittie li doivent appartenir, le Roy de France sera tenu de les faire delivrer au Roy d'Angleterre, a ses despenz.
Et, samblablement, le Roy d'Angleterre fera delivrer, a ses despenz, les forteresces, qui, par ce present traittie, doivent appartenir au Roy de France.
Et seront tenuz les ditz Roys, & leur gens, a euls entraidier, quant ad ce requis en seront, aus gages de la partie qui le requerra; qui seront,
D'un flourin, de Flourence, par jour, pour chivalier;
Et demy flourin pour eschier;
Et pour les autres au feur;
Et, du sourplus des doubles gages, est accorde que, se les diz gages sont trop petiz, en regart au marchie des vivres en paiis, il en sera a l'ordenance de iv. chivaliers, pour ce esleuz; c'est asçavoir, ii. d'une partie, & ii. d'autre.
XXX. Item, est accorde que tous les arcevesques, evesques, & autres prelaz de sainte eglise, a cause de leur temporalite, seront subgiez de celi des ii. Roys, souz qu'il tendront leur temporalite; &, se il ont temporalite souz touz les ii. Roys, il seront subgiez de chascun des ii. Roys pour leur temporalite, qu'il tendront soubz chascun d'iceuls.
XXXI. Item, est accorde que bonnes aliances, amitiez, & confederations soient faites entre les ii. Roys de France & d'Angleterre, & leurs royaumes, en gardant l'onneur & la conscience de l'un Roy & de l'autre, non obstant quelconque confederations qu'il aient, deça & dela, aveuc quelconque peronnes, soient d'Escoce, de Flandres, ou d'autres paiis quelconques.
XXXII. Item, accorde est que le dit Roy de France, & son ainsne filz, le Regent, pour eulz & pour leurs hoirs, Roys de France, si avant comme il pourra estre fait, se delairont & departiront du tout des aliances, qu'il ont aveuc les Escoz: & prometteront, si avant comme faire se pourra, que jamais eulz, ne leurs hoirs, ne les Roys de France, qui pour le temps seront, ne donront, ne feront, au Roy, ne au ro yaume d'Escoce, ne aus subgiez d'icelui, presens & a venir, aide, confort, ne faveur contre le dit Roy d'Angleterre, ne contre ses hoirs, ne successeurs, ne contre son royaume, ne contre ses subgiez, en quelconque maniere; & qu'il ne feront autres aliances aveuc les diz Escoz, en aucun temps a venir, encontre les diz Roy & royaume d'Angleterre.
Et, samblablement, si avant comme faire se pourra, le Roy d'Angleterre, & son ainsne filz, se delairont & departiront des aliances, qu'il ont aveuc les Flammenz: & prometteront qu'eulz, ne feront, aus Flamenz, presens ou a venir, aide, confort, ou faveur contre le Roy de France, ses hoirs, & successeurs, ne contre son royaume, ne contre ses subgiez, en quelque maniere; & qu'il ne feront autres aliances avec les Flamenz, en aucun temps a venir, contre les Roys & royaume de France.
XXXIII. Item, accorde est que les collations & provisions, faites d'une partie & d'autre, des benefices, vacanz tant comme la guerre a dure, tiegnent & soient valables; & que les fruez, yssuez, & revenuez, recevez & levees de quelconques benefices, & autres choses quelconques, es diz royaumes de France & d'Angleterre, par l'une partie & l'autre, durant les dittes guerres, soient quittes d'une partie & d'autre.
XXXIV. Item, que les Roys dessus diz serront tenus de faire confermer toutes dessus dittes par, notre Saint Pere, le Pape, & seront vallees par seremenz, & sentences, & censures de court de Romme, & tous les autres lieux, en la plusfort maniere que faire se pourra.
Et seront empetrees dispensations, & absolutions, & lettres de la ditte court de Rome, touchanz la perfection & complissement de ce present traittie, & seront bailles aus parties, au plus tart, dedenz les iii. sepmaines apres ce que le Roy sera arrives a Calais.
XXXV. Item, que touz les subgiez des diz Roys, qui voldront estudier es estudes & universites des royaumes de France & d'Angleterre, joyront des privileges & libertez des dittes estudes & universites, tout aussi comme il povoient faire avant ces presentes guerres, & comme il font ad present.
XXXVI. Item, a fin que les choses dessus dittes, traittees & parlees, soient plus fermes, stabliz, & valables, seront faites & donnees les fermetez qui s'ensuivent; c'est asçavoir,
Lettres seelles de seaux des diz Roys, & des ainsnez filz d'iceuls, les meillours qu'il pourront faire & ordener par les conceils des diz Roys;
Et jureront les diz Roys, & leurs enfanz ainsnez, & autres enfanz, & aussi les autres des linages des diz seigneurs, & autres grantz des royaumes, jusques au nombre de xx. de chascune partie qu'il tendront, & aideront a tenir, pour tant comme a chascune d'eulz touche, les dittes choses traittees & accordees, & accompliront, senz jamais venir au contraire, senz fraude, & senz mal engin, & senz faire nul empeschement.
Et se il avoit aucun, du dit royaume de France, ou du royaume d'Angleterre, qui feussent rebelles, ou ne vausissent accorder les choses dessusdittes, les ii. Roys feront tout leur povoir de corps, de biens, & d'amis, de mettre les diz rebelles en vrai obeissance, selon la fourme & teneur du dit traittie.
Et, aveuc ce, se submettront les diz Roys, et leurs hoirs, et royaumes, a la cohercion de notre Saint Pere le Pape, afin qu’il puisse contraindre, par sentences, censures d’églises, et autres voyes deues, celui qui sera rebelle, selonc ce qu’il sera de raison.
Et, parmy les fermetez et seurtez dessus dittes, renonceront les diz Roys, et leurs hoirs, par foy et par serement, a toutes guerres et a tous procès de fait.
Et, se par désobéissance, rébellion, ou puissance de aucuns subgiez du royaume de France, ou autre juste cause, le Roy de France, ou ses hoirs, ne povoient accomplir toutes les choses dessus dittes, le Roy d’Engleterre, ses hoirs, ou aucun pour eulz, ne feront, ou deveront faire guerre contre le dit Roy de France, ses hoirs, ne son royaume; mais touz ensamble s’efforceront de mettre les diz rebelles en vraie obéissance, et de accomplir les choses dessus dittes.
Et aussi, se aucuns, du royaume et obéissance du Roy d’Engleterre, ne voloient rendre les chasteaux, villes, ou forteresces, qu’il tiennent ou royaume de France, et obeir au traittie dessus dit, ou pour juste cause ne pourront acomplir ce qu’il doit fere par cest présent traittie, le Roy de France, ne ses hoirs, ou aucun pour euls, ne feront point de guerre au Roy d’Engleterre, ne a son royaume, mais touz II ensamble feront leur povoir de recouvrer les chasteaux, villes, et forteresces dessus dittes, et que toute obéissance et accomplissement soient faiz es traittiez dessus dittes.
Et seront aussi faites et donnees, d’une part et d’autre, selon la nature du fait, toutes manieres de fermetez et seurtez, que l’on saura en pourra deviser, tant par le Pape, le collège de la Court de Rome, comme autrement, pour tenir et garder parpetuelement la paix, et toutes les choses par dessus accordees.
XXXVII. Item, Est accordé que, par ce présent traittie et accort, touz autres accorz, traittiez, ou prolocutions, se aucuns en y a faiz ou pourparlez ou temps passe, sont nulz, et de nulle valeur, et du tout miz a néant, et ne s’en pourront jamais aider les parties, ne faire aucun reproche l’un contre l’autre, pour cause d’iceulz traittiez ou accorz, se aucuns en y avoit, comme dit est.
XXXVIII. Item, Que ce présent traittie sera approuve, jure, et conferme par les II Roys a Calais, quant il y seront en leurs personnes.
Et, depuis que le Roy de France sera parti de Calais, et sera en son povoir, dedenz un mois prochein ensuivant ledit departement, ledit Roy de France en fera lettres confirmatoires, et autres nécessaires ouvertez, et les envoyera et délivrera, a Calais, audit Roy d’Engleterre, ou a ses députez au dit lieu.
Et aussi le dit Roy d’Engleterre, en prenant les dittes lettres confirmatoires, en baillera lettres confirmatoires, pareilles a celles du dit Roy de France.
XXXIIII. Item, Est accordé que nul des Roys ne procurera, ne fera procurer, par lui, ne par autre, que aucunes nouveletez ou griefs se facent par l’église de Rome, ou par autres de sainte église quelconques il soient, contre ce présent traittie, sur aucun desditz Roys, leurs coadjuteurs, adherenz, ou aliez, quelconques il soient, ne sur leurs terres, ne de leurs subgiez, pour achais ou de la guerre, ou pour autre cause, ne pour services que les diz coadjuteurs ou aliez aient fait aux diz Roys, ou aucun d’iceulz; et, se notre dit Saint Pere ou autre le vouloient faire, les II Roys le destourberont, selonc ce qu’il pourront, bonnement, senz mal engin.
XXXX. Item, Des ostages, qui seront bailles au Roy d’Engleterre a Calais, de la manière et du temps de leur departement les II Roys en ordeneront a Calais.
Toutes lesquelles choses dessus escriptes, et chascune d’icelle furent faites, ordenees et accordeez par et en la présence.
De reverent pere en Dieu, nôtre tres cher et feal chancelier, Jehan par la grâce de Dieu, esleu de Bicauvez, Perde France;

Noz amez et feaulz conseilliez, maistre Estienne de Paris, chanoine; Pierre de la Charite, chantre de l’eglise de Paris; Jehan de Angerent, doien de Chartres; messire Jehan de Mengre, dit Boucicant, mareschal de France; Charles, sire de Mountmourency; Evart de la Tour, sire de Vinay; Jehan de Groutée; Regnault de Govillons; Pierre d’Omont; Symon de Bucy.

Chivalers: maistres, Guillaume de Dormans, et Jehan Des Marez, Jehan Maillart.

Bourgois de Paris: maistres, Mate Guehery, et Nichole de Verres, nos clers, secrétaires.

Commiz et deputez, de par nous, sur ce, avec les commiz et deputez dudit Roy d’Engleterre, ci dessous nommez; c’est asçavoir,

Monsieur Henry, duc de Lancastre; William, conte de Northampton; Thomas, conte de Wardwikz; Raoul, conte de Stafford; William, conte de Sarebris; Monsieur Gautier, sire de Manny; monsieur Regnault de Cobham; monsieur Jehan de Beauchamp; monsieur Guy de Brian; Jehan Capital de Buch; Bertholomieu de Burgoshe; Frances de Hale; Guilliaum de Granson; Jehan Chaundos; Noel Loreng; Richart Lavache; Miles de Stapelton.

Chivalers: monsieur Jehan de Wynewykz, chancelier du Roy d’Engleterre; maistre Henry de Ashton; maistre Williaume de Laughteburgh; maistre Jehan de Branketre; Adam de Hylton, et Williaume de Tyrringham. L’an, et le jour, et au lieu dessusdits.